Muqdisho(Bosaso-media)-

Dowladda KMG ah ayaa maanta ku eedaysay ururka Al-shabaab inuu mas'uul ka yahay gubashadii qeybo kamid ah suuqa weyn ee Bakaaraha oo habeeno kahor uu qabsaday dab xooggan kaas oo baabi'iyey hanti fara badan.

Wasiiru dowlaha Gaashaandhigga dowladda KMG ah Yuusuf Maxamed Siyaad Indhacadde oo maanta shir jaraa'id ku qabtay magaalada Muqdisho ayaa sheegay in ururka Al-shabaab uu ka dambeeyey gubashadii qeybo kamid ah suuqa weyn ee Bakaaraha.

Yuusuf Indhacadde ayaa sheegay in shaqsiyaad katirsan ururka Al-shabaab ay lahaayeen Shidaalkii ku gubtay suuqa Bakaaraha islamarkaana ay si bareer ah dab u qabadsiiyeen iyagoo arrintaas ka leh ujeedooyin gaar ah.

"Nimaankaan mooryaan diimeedka ah ayaa gubay suuqa Bakaaraha, iyago doonaya inay ganacsatada hanti uga dhacaan, Dowladdu ganacsatada waxay uga digaysaa in hantida la aruurinayo ay gacanta u galiyaan Al-shabaab" ayuu yiri Yuusug Maxamed siyaad Indhacadde.

Indhacadde ayaa meesha ka saaray eedeyn ay dowladda KMG ah u jeediyeen xoogagga hubaysan oo aheyd inay ka dambeeyeen gubashadii suuqa Bakaaraha, waxaana uu sheegay in dowladda KMG ah ay arrinkaas Berri ka tahay.

Si kastaba ha ahaatee ururada Al-shabaab iyo Xizbul Islaam ayaa horay dowladda KMG ah iyo ciidamada AMISOM waxa ay ugu eedeeyeen inay mas'uul ka ahaayeen gubashadii suuqa weyn ee Bakaaraha magaalada Muqdisho.

Axmed Cali Kilwe